Afsonaviy pop yulduz Michael Jackson 2009 yilda vafot etganidan so‘ng, uning ulkan boyligi farzandlariga meros sifatida qoldirilgani ma’lum bo‘lgan. Biroq oradan yillar o‘tganiga qaramay, qo‘shiqchining uch farzandi — Prince Jackson, Paris Jackson va Bigi Jackson — bu mablag‘larning katta qismini hanuz to‘liq ololmayapti.

Ma’lum bo‘lishicha, buning sababi merosdan butunlay mahrum bo‘lish emas, balki yirik huquqiy va soliq mojarolari bilan bog‘liq. Michael Jackson vasiyatnomasiga ko‘ra, uning boyligining 40 foizi farzandlariga, 40 foizi onasi Ketrin Jeksonga, qolgan 20 foizi esa xayriya tashkilotlariga ajratilishi kerak edi.

Ammo Jeksonning mulki qiymati va soliqlar bo‘yicha AQSH soliq xizmati — IRS bilan kelishmovchilik yuzaga kelgan. Soliq organlari san’atkorning mulki avval kam baholanganini aytib, yuzlab million dollar miqdorida qo‘shimcha soliq talab qilgan. Shu sababli meros jamg‘armasidan farzandlarga pul ajratish jarayoni vaqtincha to‘xtatilgan.

Hozircha sud jarayonlari yakunlanmagani sababli, merosning asosiy qismi muzlatilgan holda qolmoqda. Shunga qaramay, Jeksonning farzandlari to‘liq moliyaviy yordamsiz emas — ular jamg‘arma hisobidan muntazam nafaqa yoki xarajatlar uchun mablag‘ olib turishadi.

So‘nggi yillarda esa yana bir mojaro yuzaga keldi: Paris Jekson otasining mulkini boshqarayotgan menejerlar merosni noto‘g‘ri boshqarayotgani va katta miqdordagi mablag‘lar sarflanayotganini da’vo qilib, sudga murojaat qilgan.

Shu sababli, dunyodagi eng mashhur musiqachilardan birining farzandlari milliardlab boylikka merosxo‘r bo‘lsa-da, ularning bu mablag‘ga to‘liq egalik qilishi hali ham huquqiy jarayonlarga bog‘liq bo‘lib qolmoqda.